Nýtt þema.

Hef ákveðið að hætta öllum skrifum í anarkistastíl og ætla nú að einbeita mér að jákvæðari flötum dægurmálanna. Ætla þó að byrja á byrjuninni svolítið fyrir daga Biblíunnar.

Það er nú gott að risaeðlurnar séu vaknaðar til lífsins aftur en eftir að fulltrúar þeirra uppgötvuðu stóra og fallega sjóði gömlu Samvinnutrygginganna og komu sér fyrir í gamla góða Búnaðarbankanum, hinu undurskemmtilega Vís, sí-malandi Símafélaginu og einu eða tveimur hinna samstilltu og samstíga olíufélaga ásamt því að hafa komið fiskinum í sjónum á fárra og góðra  manna hendur hefur hagur þeirra heldur betur tekið við sér. Því þykir mér heldur ljótt að sjá hvernig farið er með málefni REI þar sem þeirra fyrrum yfir risaeðla núna sitjandi í stjórn Orkuveitunnar er ekki spurð að einu eða neinu. Eins finnst mér ljótt af fjölmiðlum að blása eitthvað upp þó þær séu aðeins að breyta vöxtunum á húsnæðislánunum þegar eitthvað misyndisfólk dirfist að detta í hug að taka þau yfir undir því yfirskyni að það sé bara að kaupa íbúð. Þar er eitthvað meira og gruggugara að baki og því rétt að hækka vextina vel og rækilega. Ekki væri gott í sögulegu samhengi ef þær myndu deyja fyrir fullt og allt og ætti því almennigur að fagna ef hver og einn getur lagt meira af mörkum til viðhalds upprisinni dýrategund.

Látiði svo risaeðlurnar í friði því þær gætu auðveldlega étið ykkur.