Eitt á dag.

Þá eru tveir jólasveinar komnir til byggða. Ég útskýrði fyrir Arnari að börn sem eru þæg fá eitthvað fallegt í skóinn frá jólasveinunum en hin sem eru óþæg fá ónýta kartöflu. Við fundum góðan skó og settum hann í sameiningu út í gluggann hans. Þegar skórinn var kominn á sinn stað leit Arnar spurnar augum á pabba sinn og sagði: " En hvar fáum við ónýta kartöflu ?"

 Arnar fékk svaka flottan Slökkviliðsbíl í skóinn. Hann er úr timbri og jólasveinarnir hafa örugglega smíðað hann sjálfir í jólasveinahellinum. Það var fullt af nammi í honum og Arnar sýndi mér eitt pínulítið súkkulaðistykki og tilkynnti að það mætti bara borða eitt á dag. Um leið og hann var búinn með súkkulaðistykkið tók hann það næsta, opnaði það og sagði strangur að það mætti bara borða eitt svona á dag. Svona kláraði hann þessi fimm pínulitlu súkkulaðistykki á stuttum tíma en það var alveg á hreinu að það mátti bara fá eitt á dag. Þar sem hann fann þetta upp hjá sjálfum sér var ég ekkert að skammast í honum en sennilega hefur eitthvað ruglast saman hjá honum reglan með jóladagatalið en þar má alveg örugglega bara fá eitt súkkulaðistykki á dag.

Athugasemdir

[Anna Viðarsdóttir, 13.12.2007 kl. 20:03]

Ég er alltaf að sjá það betur og betur að við erum bara mikið skyld!

[Gyða Björk Jónsdóttir, 15.12.2007 kl. 13:36]

Arnar Máni pantaði að horfa á Pétur Pan í morgun og vildi endilega að ég settist hjá honum og horfa með honum.   Þá sagði ég en hver á þá að taka til í húsinu okkar og gera fínt.  Hann pabbi okkar getur gert það var svarið :)

Svo var hann að tjá sig um Kaftein krók úr Pétri Pan en hann notaði reyndarorðið Ketkrókur, smá ruglingur í gangi.

Og svo bað hann enn og aftur  um sykurpúða út á súrmjólkina sína í morgun.

Þvílíkur krúttaradrengur :)