Hugleiðingar í upphafi nýs árs.

Þessi agnarsmáu augnablik sem við lifum nú þessa mánuðina og þá næstu geyma að margra mati stærstu tækifæri Íslandssögunnar og jafnvel heimssögunnar. Það hefur verið kvartað yfir hugmyndaleysi meðal mótmælenda efnahagsklúðursins þannig að ég læt hér vaða nokkrar hugmyndir sem væri kannski hægt að skoða og slípa til. 

Íslenska efnahagssvæðið og gjaldmiðill framtíðarinnar 

Og nú ætla ég að skrifa á hreinni íslensku...
Við sem þjóð með sjálfstæða stjórn þurfum nú að breyta okkur úr brjáluðu innflutnings og kaupæðisþjóðfélagi yfir í framleiðslu, útflutnings- og söluþjóðfélag enda undanfarin ranggengisár íslensku krónunnar búin að rústa fjárhag okkar í heild sinni.
Við þurfum að koma Íslenskum atvinnuvegum á það plan að boðlegt sé bæði  á innlendum sem alþjóðlegum vettvangi.
Vegna atburða síðustu mánaða hefur alheimurinn misst alla trú á gjaldmiðli okkar og ef vel á að vera þarf að umskýra Íslensku krónuna okkar svo hægt sé að ná því trausti til baka og er þá nærtækast að taka upp nafnið Skildingur. Það ætti nú ekkert að kosta skildinginn smá nafnabreyting miðað við ávinninginn. Afnema ætti verðtryggingu með öllu eða hafa hana allsráðandi á öllum sviðum. Ekki er tækt að ýmsir liðir hækki um tugi prósenta milli mánaða svo sem leiga og húsnæðisafborganir en á sama tíma standa laun almennings í stað eða lækka jafnvel. Það skapar bara vandamál. Einnig er nauðsynlegt að breyta nafni gjaldmidilsins því ef við hugsum nógu og stórt blasir við að Evrópusambandið í heild sinni, öll helstu ríki N-Ameríku þar á meðal  Mexícó og Kanada gætu farið að íhuga gaumgæfulega aðild að Íslenska efnahagssvæðinu. Ef ekki á nýju ári þá eigi síðar en því næsta eða þarnæsta þar á eftir en ég má ekki segja hvers vegna sökum b...leyndar.

Landbúnaður.

Allt sem þarf í þessum málaflokki er bæði einfalt, fljótlegt og áhrifaríkt ...
Nú er tækifæri til að koma besta landbúnaði heims á blað. Skipta út tilbúnum áburði fyrir lífrænan og öðru sem til þarf og votta ALLT sem lífrænt ræktað. Bjóða þarf alheiminum upp á fósturvísa úr íslensku kúnni vegna sérstakra eiginleika mjólkurinnar hennar gegn t.d. sykursýki auk þess sem við erum með lang bragðbestu mjólk sem fyrirfinnst. Einnig þarf að gera bændum kleift að selja einhvern hluta afurðanna beint til neytandans. Það þarf að koma afurðunum á alþjóðlega markaði sem hágæðavöru með hámarks virðisauka í huga til hagsbóta fyrir alla Íslensku þjóðina.

Moldarkofahokur og draslverðlagning á hágæða afurðum ætti að tilheyra miðöldum.

Sjávarútvegur.

Það eru mikil tækifæri framundan í sjávarútvegi...
Nú þegar allir helstu bankar landsins er í ríkiseign gefst einstakt tækifæri á að afnema óréttlátt gjafakvótakerfi það sem viðgengist hefur hér á landi undanfarin ár. Enda munu atkvæði þeirra 10 sem nú eiga allan kvótann ekki duga til að koma manni inn á þing samanber Framsóknarflokkinn sáluga. 
Veiðigjald er nærtækasti arftakinn að mati undirritaðs. Veiðigjaldið legðist á afla upp úr sjó og núverandi kvótaeigendur ættu þá inneign sem gengi upp í veiðigjald komandi missera. Aflamarki yrði að stýra með ákveðið mörgum sóknardögum í mánuði. Togarar færu út fyrir 50 mílurnar með sín botnsnertandi og að margra mati botneyðileggjandi tól þar til þeir hafa verið úreltir. Handfæraveiðar stórefldar og tilbúnum kóröllum komið fyrir á gömlum togslóðum.

Votta fiskveiðar okkar sem sjálfbærar eftir alþjóðlegum stöðlum.

Iðnaður og auðlindir.

Að fara yfir lækinn...
Nú á að vera ægilega mikil olía úti fyrir austurlandi og hafa sumir verið að gera sig digra og kalla sig olíumálaráðherra. Lítraverð á olíutengdu eldsneyti til neytenda hefur undanfarið verið um 110-190 krónur á líterinn og hefur farið hratt lækkandi undanfarnar vikur. Álögur ríkis vegna veggjalds hleypur á stórum prósentum. Á sama tíma kostar hálfur lítri af vatni um 180 krónur til neytenda og hefur farið hratt hækkandi. Við erum með ótakmarkað magn af vatni. Ég get ekki betur séð í fljótu bragði en að það mætti auðveldlega fá margfalt meiri tekjur af vatninu okkar heldur en því takmarkaða magni af olíu sem þarf að eyða milljörðum í til að ná upp af hafsbotni. Kannski er þetta allt gott í bland.
Í rafmagnsmálum þyrfti að stórefla smávirkjanir sem ekki krefjast stórra miðlunarlóna og auðvelda þeim tengingu við landsnetið.
Svo þarf auðvitað að beisla vindinn og sjávarföllin.
 

Samgöngur.

Mesta gjaldeyrissóun frá upphafi byggðar hefur viðgengist í þessum málaflokki...
Rafmagni verði komið á allan ökutækjaflotann og samið við stóra bílaframleiðendur eins og til dæmis Toyota/Lexus um framleiðslu á umhverfisvænum línum bílaframleiðslunnar.
Almenningssamgöngur verði stórbættar með heildarlausnum fyrir daglegar þarfir einstaklingana.

Aðkoma ríkis aukin í samgöngumálum sveitarfélaganna enda hefur mikil óþarfa gjaldeyrissóun verið viðloðandi þennan málaflokk undanfarna áratugi.

Menntamál

Víð Íslendingar eru framarlega í flokki í menntamálum...
 Eingöngu þarf að slípa áherslurnar lítillega til. Við þurfum til dæmis að kenna börnunum okkar að fara vel með peninga, mat og allt sem snertir þeirra daglega líf. Byrja strax í skólunum og auðvitað á heimilium að hugsa allt til enda. Ekki bara það sem er að gerast í augnablikinu. Kenna þeim afleiðingar af aðgerðum sínum. Þá "búum" við til góða einstaklinga fyrir komandi ár. Einstaklinga sem stjórna landinu þegar að við erum orðin gömul.
Setja þarf upp tómstundasetur þar sem ungmenni geta hist og stundað heilbrigða afþreyingu allt frá íþróttaiðkun til vísindatilrauna.

Efnahagsmál og efnahagshrun

Við þurfum að standa saman...
Dæmið er stærra en nokkur venjulegur maður getur ímyndað sér og nú er aldeilis komið annað hljóð í strokk samsæriskenningarmanna og kvenna. Fyrrverandi hlutaðeigandi 33 meintir aðilar og orsakavaldar bankahrunsins hér á Íslandi eru hér nánast beðnir afsökunar fyrir hönd þjóðarinnar en auðvitað afsakar græðgi ekki einfeldningsháttinn.

Þeir munu flokkast sem fórnarlömb ef neðanritað á við nokkur rök að styðjast sem sennilega mun aldrei koma í ljós. En auðvitað þarf að skipta út fólki og fá nýtt blóð í forystusveitina. 

Það er nefnilega komið upp úr dúrnum að svo virðist sem Íslensku bankarnir og aðrir bankar í heiminum hafi gengið í gildru alþjóðlegra samtaka aðila sem allt eiga og allt geta. Þeir hafa einfaldlega Þegið fullt af milljarðalánum á góðum kjörum sem svo allt í einu"alveg óvart" voru bara því miður gjaldfelld af ýmsum "óviðráðanlegum" mismunandi ástæðum. Einhverjir gamalgrónir bankar settir í gjaldþrot bara sísona og einhver dularfull undirmálslán, fölsuð lán og allt gert til að dæmið minni ekki of mikið á orsakir kreppunnar 1930.

Það er nefnilega málið. Sama eða svipað trix var notað í kreppunni 1930 og er aðaltilgangurinn hjá þessum gríðarlega stóru peningaöflum að komast yfir ýmsar eignir fyrir lítið fé.  Þegar hlutaðeigandi ríki eru svo til komin í þrot munu hinir stóru aðilar birtast og taka yfir helstu eignir viðkomandi ríkis svo sem orkufyrirtækin, símafyrirtækin, samgöngufyrirtækin og helstu eignir sem skila munu "réttu" eigendunum góðum arði í næstu uppsveiflu. Ástæða kreppunnar er einfaldlega sú að þessi peningaöfl voru orðin leið á tilbreytingarleysinu. 
Jæja... svona eru pælingarnar hjá lengra komnum þessa dagana.

 Utanríkis- og varnarmál

Hvað er að gerast í Palestínu ofan á allt annað fyrir botni miðjarðarhafs. Eru ísraelsmenn að hefja biblíustríðið hans Bush? Og hvernig endar það? Eru Þeir ekki þar að auki með öll gereyðingarvopnin sem þeir seldu Saddam á sínum tíma en "fundust ekki"?
Fyrir 10 árum heyrði ég sögur um það hvernig raðir kjarnorkueldflauga voru grafnar neðanjarðar í sandinn í Írak og var því mjög hissa þegar upp úr kafinu kom að það voru "engin slík vopn neinsstaðar að finna sama hvað þeir "leituðu" vel."
Á Barak Obama að taka við vítislogum af Bush sem nú notar síðasta tækifærið sem áhrifamesti maður Ísraels til að koma af stað stríði stríðanna áður en hann hættir?
Hef annars aldrei skilið þetta ísraelsdæmi. Er þetta ekki bara eitthvað svipað og ef við ætluðum að ryðjast inn í noreg af því að við vorum einu sinni þar. Það yrði eitthvað sagt ef við værum að smala saman norðmönnum inn í einhverjar herkvíar og senda svo sprengjur yfir þá ef þeir væru með eitthvað múður. Ég hef aldrei skilið þetta dæmi en kannski er bara engin vanþörf á Bjarnason army eftir allt saman.

Fleiri hugmyndir eru vel þegnar

 Það væri gaman að heyra hvort það séu fleiri með hugmyndir og eins hvort það séu fleiri "Hægri grænir" þarna úti.

Lifið heil á komandi ári og á komandi umrótartímum.