Veit ekkert...

... nú er svo komið að maður veit ekkert lengur í sinn haus. Enginn er að rannsaka neitt, Davíð er fullkominn eftir allt, bankarnir hrundu vegna atburða langt úti í heimi og Ingibjörg Sólrún og Geir Haarde eru sjálfsagt í pólitísku reipitogi hvort það eigi að styðja við bakið á erlendum milljarðaeigendum eða almenningi Íslands með nýfengnu láni. Á meðan gerist ekkert. Það gerist ekkert fyrr en annað þeirra missir takið eða nær að draga hitt yfir miðlínuna eða þá að reipið slitni. Enginn trúir lengur orði sem sagt er. Ég held það þurfi bara að skipta út ca 100 manns. Allt Alþingið, öll Seðlabankastjórn + allt Fjármálaeftirlitið. Það er ekki að sjá að neinn í þessum hópi sé að spá minnstu hugsun í almenning í þessu landi. En auðvitað er maður löngu hættur að skilja þetta allt...
 
Ég er kannski farinn að hljóma eins og Cató gamli forðum daga í senatinu sem endaði allar ræður eins: „Svo legg ég til að Karþagó verði lögð í auðn“.
...nema hvað, ...ég legg enn og aftur til að eignir bankanna gömlu verði kortlagðar, skyndigjafasölum bestu bitanna verði rift og þær seldar fullu verði í rólegheitunum og andvirði þeirra notaðar til greiðslu þessara lána og afgangurinn til dæmis notaður til að leggja inn 4-6 milljónir inn á reikning hjá öllum nýfæddum börnum þessa lands, því eignirnar voru jú helmingi hærri en skuldirnar fyrir bankahrunið og fyrir gjafaskyndisölur bestu bitanna. Munum að bankarnir komust í greiðsluþrot,... það vantaði gjaldeyri , ...þeir urðu ekki gjaldþrota. 

Ég skora á Agnesi Bragadóttur eða aðra dugandi blaða- og fréttamenn að komast til botns í þessu með eignirnar, og þá að sjálfsögðu eignir allra bankanna þriggja, og ég skora á almenning að láta ekki viðgangast að eignir ríkisins séu gefnar vinum og kunningjum en börnin látin borga skuldirnar...

IMF samþykkir lán til Íslands